ពោធិ៍សាត់: កាកបាទក្រហមកម្ពុជាបានឧបត្ថម្ភថវិកាចំនួន ៦៩៨.០០០ ដុល្លារបន្ថែមទៀតដល់សមាគមអតីតយុទ្ធជនកម្ពុជាសម្រាប់សាងសង់ផ្ទះចំនួន ៣២៨ ខ្នងនៅខេត្តពោធិ៍សាត់។ កម្មវិធីនេះត្រូវបានបង្កើតឡើងដោយប្រធានកាកបាទក្រហមកម្ពុជាសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស។
ពិធីផ្តល់ថវិកានេះបានធ្វើឡើងនៅទីស្នាក់ការកណ្តាលកាកបាទក្រហមកម្ពុជានិងមានការចូលរួមពីអនុប្រធាននិងអគ្គលេខាធិការសមាគមអតីតយុទ្ធជនកម្ពុជាលោក គន់ គីម។ នេះគឺជាដំណាក់កាលទី ៣ នៃការផ្តល់មូលនិធិដើម្បីបន្តការសាងសង់លំនៅដ្ឋានជូនអតីតយុទ្ធជនសរុបចំនួន ៦២៨ នាក់នៅស្រុកភ្នំក្រវាញ ខេត្តពោធិ៍សាត់។
ការបរិច្ចាគដំណាក់កាលទី ១ ចំនួន ៥០ម៉ឺនដុល្លារត្រូវបានធ្វើឡើងនៅថ្ងៃទី៨ ខែកុម្ភៈ ជាមួយនឹងការបន្ថែម ១លានដុល្លារនៅថ្ងៃទី៦ ខែកក្កដា។ ផ្ទះចំនួន ៥០ខ្នងដំបូងត្រូវបានប្រគល់ឱ្យអតីតយុទ្ធជននៅថ្ងៃទី១២ ខែមិថុនា និងចំនួន២៥០ ខ្នងទៀតនៅថ្ងៃទី១៥ ខែសីហា។ ដំណាក់កាលចុងក្រោយដែលពាក់ព័ន្ធនឹងផ្ទះចំនួន ៣២៨ខ្នងគ្រោងនឹងប្រគល់នៅខែវិច្ឆិកា៕
